"Айбын" әскери журналы мен National Geographic журналының редакциялары ынтымақтастық туралы меморандумға қол қойды, деп хабарлайды Қорғаныс министрлігінің баспасөз қызметі.
Аталған құжат контентпен өзара алмасуға, ортақ жобаларды іске асыруға, бірлескен зерттеулер мен экспедицияларды өткізуге негізделген. Ағымдағы жылы еліміздің Қарулы Күштерінің қызметін жан-жақты жария ететін үздік фотожұмыстардың фотокөрмесін өткізу жоспарлануда. Болашақта еліміздің түкпір-түкпіріндегі маңызды әскери-тарихи жерлер, полигондар, тарихи шайқас орындары және т.б. бойынша бірлескен экспедицияларды ұйымдастыру ойда бар.
"Сарбаз" газеті, "Айбын" журналының National Geographic-пен бірлескен жобалары зерттеулерді жүргізіп және қазақстандық армияның имиджін дәріптеп, оқырмандарды Қазақстанның әскери саласымен таныстырып қана қоймай, сонымен бірге, журналистерге баға жетпес тәжірибе жинақтауға және материалдар жазу әдістемесімен алмасуға мүмкіндік береді, – дейді "Сарбаз" газеті мен "Айбын" журналының бас редакторы Батырхан Қуатбек.
"Сарбаз" республикалық әскери-патриоттық газеті мен "Айбын" әскери журналы Қазақстан Республикасының қарулы күштерінде болып жатқан маңызды оқиғаларды жариялайтынын айта кету қажет. Басылым беттерінде оқырман елімізде әртүрлі деңгейде өткізіліп жатқан оқу-жаттығулар, әскери-патриоттық жиындар, жауынгерлік даярлықпен байланысты Қазақстанның түкпір-түкіпірінде орналасқан әскери бөлімдердің жаңалықтарын, армиялық спортшылардың жетістіктерін, әлем армияларында болып жатқан соңғы оқиғаларды, әскери қызметшілермен өткізілген сұхбаттар туралы ақпарат таба алады.
