Еліміздің бірқатар ақпарат құралдарында "вакцинациядан өткеннен кейінгі электрондық паспортты сату бойынша жаңа бизнес" туралы материал жарияланған болатын. Алматы қалалық Қоғамдық денсаулық басқармасы бұл факт әлі расталмағанын және мұндай іс-әрекет заңмен қудаланатынын ескертті, деп хабарлайды inbusiness.kz.
"Аталмыш материал бойынша арнайы қызметтік тергеу жұмыстары басталды.
Қазіргі уақытта вакцинациядан өткендігі туралы электрондық паспортты беру фактісі расталмады. Сонымен қатар, барлық медициналық ұйымдар мен РЭДО-ның ақпараттық жүйелері және дерекқорларын толық салыстырып тексерілуде. Аталған ақпарат расталған жағдайда, тергеу нәтижелері ҚР Заңына сәйкес шаралар қолдану үшін құқық қорғау органдарына берілетін болады. Сонымен қатар Қоғамдық денсаулық басқармасы вакцинациялау мәселелері бойынша жүйелерге қол жеткізе алатын қызметкерлермен алдын алу іс-шараларын жүргізеді", - деп жазылған басқарма таратқан хабарламада.
