Маңғыстау облысының Түпқараған ауданындағы Солтүстік Бозащы кен орнында мұнай өндіретін Вuzachi Operating компаниясының филиалы 2016 жылы 1 млн 526,1 мың тонна мұнай өндірді, деп хабарлады "Интерфакс-Қазақстан" агенттігіне облыстық индустриялдық-инновациялық даму басқармасынан.
Компания 2015 жылы 1 млн 777,2 мың тонна мұнай өндірген. Осылайша, былтыр өндіру 14%-ға төмендеді.
Айта кетейік, 2016 жылы кен орнында жаңадан 36 ұңғыма бұрғыланып, іске қосылған болатын.
Солтүстік Бозащы кен орны 1974 жылы ашылған. Buzachi Operating Ltd – Маңғыстау облысының аумағында, Ақтау қаласынан солтүстікке қарай 250 шақырымда орналасқан Солтүстік Бозащы кен орнын игеру үшін 2004 жылы желтоқсанда құрылған компания.
Buzachi Operating-ке қазіргі таңда қытайлық CNPC және "Лукойл" ААҚ-ның еншілесі "ЛУКОЙЛ Оверсиз" тепе-тең иелік етіп отыр.
