Енді нөмірі сақталмаған адамдарға да WhatsApp арқылы хат жолдауға болады. Мессенджер жасаушылар оның жаңартылған нұсқасын ұсынды, деп хабарлайды inbusiness.kz WABetaInfo порталына сілтеме жасай отырып.
Мессенджердің жаңа нұсқасында хат алмасуды бастау үшін бар болғаны "Жаңа чатты бастау" опциясын таңдап, оның нөмірін ашылған терезеге енгізу жеткілікті. Әрі қарай барлығы құпиялылық саясатына сай болып, оған хабарлама жазуға рұқсат етілсе, контакт іздеу бағдарламасында көрсетіледі. Бұрын WhatsApp-та біреуге хабарлама жіберер алдында оның нөмірін сақтау міндетті еді.
WABetaInfo бұл мүмкіндікті пайдалы әрі көптен күткен жаңалық санайды, өйткені біраз пайдаланушылар жаңа таныстардың нөмірлерін сақтауды ұмытып жатады.
Портал жаңа опция Android пен iOS үшін WhatsApp қосымшасының соңғы нұсқасында ашылады деп жазады. Оны орнату үшін Google Play немесе App Store дүкеніне кіріп, WhatsApp каталогынан тауып, "Жаңарту" түймесін басу керек.
