ҚР Сыбайлас жемқорлыққа қарсы іс-қимыл агенттігінің Қостанай облысы бойынша департаменті облыстық Жер инспекциясымен бірлесіп жалпы ауданы 46 гектар жер учаскесін "шаруа қожалығы үшін" нысаналы мақсатын "коммерциялық үй-жайлар салуға" санатына заңсыз өзгерту фактісін анықтады.
Аталған учаскені нысаналы мақсаты өзгергеннен кейін азамат жер телімін 460 учаскеге бөліп, 1,5 млрд теңгеге сатуға тырысты, - деді ҚР Сыбайлас жемқорлыққа қарсы іс-қимыл агенттігінің Қостанай облысы бойынша департаментінің басшысы Бауыржан Ұзынжас.
Әкімдіктің қаулысымен жер учаскесінің нысаналы мақсатын заңсыз өзгерту жойылып, ол жайылым қорына қайтарылды.
Соңғы мәліметтер бойынша, бүгінде шаруа қожалықтарының меншігіндегі жайылымдардың тек 36% - ы ғана осы мақсатта пайдаланылады.
