Қоғамдық қауіпсіздікті қамтамасыз ету, атыс қаруы мен жарылғыш затты қолданып жасалатын қылмыс пен құқық бұзушылықтың алдын алу мақсатында 10 сәуірден бастап республика аумағында тұрғындардан заңсыз сақталған атыс қаруын, оқ-дәрілер мен жарылғыш заттарды сатып алу жөнінде кезекті акция басталды, деп хабарлайды inform.kz.
Қазір барлық қалалық және аудандық ішкі істер бөлімдерінде азаматтар тапсырған атыс қаруының, жарылғыш заттардың, оқ-дәрінің техникалық жай-күйі мен оларды тапсырғаны үшін сыйақы белгілеу комиссиясы құрылды.
Заңсыз сақталған атыс қаруын, оқ-дәріні және жарылғыш заттарды өз еркімен тапсырған азаматтар қылмыстық және әкімшілік жауапкершіліктерге тартылмайды. Ол азаматтарға тапсырған қаруының, жарылғыш заттың, оқ-дәрінің түріне және техникалық жай-күйіне байланысты айлық есептік көрсеткіштің 10-нан 100-ге дейінгі мөлшерінде сыйақы тағайындалады.
2016 жылы азаматтардан заңсыз сақталған 344 қару өтемді түрде қабылданса, оның 312-сі тегіс ұңғылы аңшы мылтығы, 32-сі иір ойықты аңшы қаруы, 235 дана қарудың оқ-дәрісі. Облыста 2014 жылы тұрғындар арасында қару-жарақ өткізген 292 азаматқа барлығы 15 000 000 теңге төленген.
