"Әскери қызмет және әскери қызметшілердің мәртебесі туралы" Заң аясында еңбек өтілі 10-нан асқан, алайда 20 жылға жетпеген, яғни денсаулық жағдайына, қысқаруына және мерзімді жасқа келуіне байланысты әскери қызметтен босатылған әскери зейнеткерлер жабық әскери қалашықтағы қызметтік үй-жайларын Қазақстан өңірлеріндегі тұрғын үйге айырбастау құқығын пайдалана алады.
Ведомство мәліметінше, Қарулы күштерде осы санатта 742 адам болған, бүгінгі таңда олардың 463-і баспанасын ауыстырды. Қалған 279 әскери зейнеткерлермен жұмыс әлі де жалғасады. Қазіргі уақытта 23 адам Алматы қаласының 79 разъезінде салынып жатқан "Рона" тұрғын үй кешені құрылысының аяқталуын күтіп отыр.
Сондай-ақ, әскери полиция өкілдерінің қатысуымен тұрғын үй қорына тексеру жүргізіліп жатыр. Заңсыз тұратын адамдар анықталса, запасқа шығарылған әскери қызметшілер арасында қайта бөлу үшін тұрғын үй-жайларды босату шаралары қолданылады.
Әскери зейнеткерлердің қалған бөлігін 2025 жылдың соңына дейін тұрғын үймен қамтамасыз ету жоспарланған.
