2021 жылғы 26 мамырда Бірыңғай жинақтаушы зейнетақы қоры (БЖЗҚ) "Отбасы банкінде" ашылған арнайы шотқа 1,3 трлн теңгеден аса қаражат аударған.
"Enpf-otbasy.kz платформасы арқылы 159 мың 621 қазақстандық тұрғын үй жағдайын жақсарту және емделу ақысын төлеу үшін жалпы сомасы 1 трлн теңге болатын зейнетақы төлемін пайдаланды. Олардың үштен бірі – әйелдер (50 мың 236) және үштен екісі – ер адамдар (109 мың 385)", - деп жазылды "Отбасы банкінің" баспасөз қызметі таратқан хабарламада.
Зейнетақы төлемін пайдалану бойынша көшбасында Маңғыстау облысы тұр: 28 мың 450 тұрғын, екінші орында – Нұр-Сұлтан қаласы 26 мың 15 адам). Үшінші орында – Алматы қаласы (21 мың 832 адам).
"Астаналықтар 162 млрд-тан аса теңгені, алматылықтар 173 млрд-тан аса теңгені тұрғын үй жағдайын жақсарту және емделу ақысын төлеуге жұмсады", - деп жазылды хабарламада.
26 мамырдағы мәлімет бойынша тұрғындар зейнетақы жинағындағы ақшаны төмендегі мақсатқа жұмсаған:
32 мың 273 адам "Отбасы Банкіндегі" заем бойынша қарызын төлеген (ішінара немесе толық);
25 мың 637 адам ипотекалық заем бойынша берешегін өтеді. Оның ішінде ислам банкінің қаржыландыруын қоса алғанда (ішінара немесе толық)
82 мың 261 адам ипотекаға жүгінбей, тұрғын үй сатып алған (толық өтеу);
8 мың 422 адам тұрғын үй құрылыс жинақ жүйесі бойынша "Отбасы банкінен" ипотекалық заем алған;
3 мың 953 адам ипотекалық заем алу үшін бастапқы жарна төледі (оның ішінде Ислам банкінің қаржыландыруы аясында);
2 мың 18 адам сатып алу құқығымен жалға алу шарты бойынша берешегін өтеген;
204 адам жеке тұрғын үй салу үшін (жер телімін сатып алуды қоса алғанда) пайдаланды;
4 мың 853 клиент емделу ақысын төледі.
