Украина басшысы әйелі Елена Зеленскаямен бірге ұшақтың баспалдағында тұрған суреттерін өзінің Telegram-арнасында жариялады, деп хабарлайды inbusiness.kz сайты.
"Украинаның Жеңіс жоспары біздің барлық одақтастарымыздың үстелінде болады", - деп жазды ол.
Бұған дейін Зеленский осы күзде Украинада соғыс қимылдары қалай дамитыны шешіліп жатқанын айтқан болатын.
"Дәл қазір мемлекеттік көшбасшылардың қазіргі ұрпағы — ең жоғары кабинеттердегілер келешек ұрпаққа не мұра қалдыратыны анықталуда", -- деп атап өтті Зеленский.
Ол алдағы күндері Жаһандық Оңтүстік, "Үлкен жетілік", Еуропа елдерінің көшбасшыларымен және халықаралық ұйымдардың басшыларымен кездесулер, сондай-ақ "Америка Құрама Штаттарының өкілдерімен өте маңызды кездесулер" өтетінін айтты.
Украина басшысының кеңсесінде хабарланғандай, Зеленский АҚШ-қа сапары кезінде БҰҰ Бас Ассамблеясында сөз сөйлейді, сонымен қатар америкалық көшбасшы Джо Байденмен кездесіп, оған өзінің "Жеңіс жоспарын" ұсынады.
Сонымен қатар, Зеленскийдің АҚШ президенттігіне кандидаттар — Камала Харрис пен Дональд Трамппен және Америка конгресінің өкілдерімен, сондай-ақ елдің қорғаныс және энергетикалық компанияларымен кездесулері жоспарланған.
Associated Press дереккөздерге сілтеме жасай отырып, Зеленский сапар барысында алдымен Пенсильвания штатындағы Скрантон қаласындағы УҚК-ға арнайы жасалатын оқ-дәрі зауытына баруды жоспарлап отыр деп жазды.
