Жамбыл облысында мемлекеттік кәсіпорынның бас есепшісіне қатысты үкім шықты. Ол 3 жыл мерзімге бас бостандығынан шектелді, деп жазады inbusiness.kz облыстық прокуратураның баспасөз қызметіне сілтеме жасап.
"Құлан-Энерго Жылу" мекемесінің бас есепшісі төлем тапсырмаларымен КМК-ның бюджет қаражатын өзінің карточкалық шоттарына аударған. Өзінің қылмыстық әрекеттерін жасыру үшін төлем тапсырмаларының бағанына тауарлар, кәсіптік, ғылыми және техникалық қызметтер үшін төлемдер ретінде төлемнің мақсатын көрсеткен.
"Тұрар Рысқұлов атындағы аудандық соттың 23 маусымдағы үкімімен кәсіпорынның бас бухгалтері қылмыстық құқық бұзушылық жасағаны үшін кінәлі деп танылып, оған 3 жыл мерзімге бас бостандығын шектеу түріндегі жаза тағайындалды. Сондай-ақ коммерциялық және өзге де ұйымдарда 3 жыл мерзімге материалдық-жауапты лауазымдарды атқару құқығынан айыру түріндегі қосымша жаза тағайындалды", - делінген хабарламада.
Сот үкімі заңды күшіне енді.
Заңсыз аударылған қаржы мемлекетке толық көлемде қайтарылды.
