Жамбыл облысында 2022 жылы 68 көпқабатты тұрғын үйдің құрылысы жүргізіліп, оның 34-і пайдалануға берілген. Бұл туралы құрылыс басқармасының басшысы Ерлан Орынбаев айтты, деп хабарлайды inbusiness.kz.
"Тұрғын үй кезегіндегі азаматтарды баспанамен қамтамасыз ету мақсатында 2022 жылы "Қуатты өңірлер – ел дамуының драйвері" ұлттық жобасы шеңберінде 4 208 пәтерлі 68 көпқабатты тұрғын үйдің құрылысы жүргізіліп, жыл қорытындысымен 2260 пәтерлі 34 үйдің құрылыс жұмыстары аяқталды", - деді басқарма басшысы.
Ерлан Орынбаевтың айтуынша, 2022 жылы құрылыс саласында 249 жобаны іске асыру көзделсе, жыл қорытындысымен 113 нысанның құрылысы аяқталып, қалған 136 нысан биылғы жылға қалған.
Былтыр білім саласында – 15 нысан, денсаулық сақтау саласында – 17 нысан, спорт саласында – 4 нысан, мәдениет саласында – 1 нысан пайдалануға берілген.
Аталған жобалар "Нұрлы жер", "Өңірлерді дамыту", "Ауыл – ел бесігі" мемлекеттік бағдарламалары аясында жүзеге асуда.
