Ішкі нарық қажеттілігін қамтамасыз ету мақсатында Жамбыл облысы, Шу қаласында жылына 150 мың тоннаға дейін қант өндіретін жоғары технологиялық зауыттың құрылысының жобасы әзірленіп жатыр, деп хабарлайды inbusiness.kz сайты.
"Меркі қант зауытының өндірістік қуатын тәулігіне 3 мың тоннадан 4 мың тоннаға дейін ұлғайту және Тараз қант зауытында жаңа технологиялық желі орнату жоспарлануда. 2026 жылдың соңына дейін Көксу қант зауытының қуаты тәулігіне 2,2 мың тоннадан 5 мың тоннаға дейін артады. Сонымен қатар, ішкі нарықтың қажеттілігін қамтамасыз ету үшін қазір "Qazsugar CO" ЖШС Жамбыл облысы, Шу қаласында жылына 150 мың тонна қант өндіретін жоғары технологиялық зауыт салу жобасын әзірлеуде. Одан бөлек Алматы облысында Al Khaleej Sugar компаниясымен бірлескен инвестициялық жобаны іске асыру жағы қарастырылып жатыр", - делінген сауал жауабында.
Сондай-ақ Ауыл шаруашылығы министрлігі жанындағы алаңда шағын қуатты жобаларға инвестиция тарту мүмкіндігі қарастырылмақ. Аталған шараға ауыл шаруашылығы кооперативтерін тарту және мемлекеттік қолдау шараларын пайдалану көзделіп отыр.
"Тараз қант зауытын жаңғырту бойынша 2025–2026 жылдарға арналған инвестициялық бағдарлама жасалды. "Аграрлық несие корпорациясының" қолдауымен жөндеу жұмыстарының бірінші кезеңі аяқталды. Өндірісті жаңғырту заманауи технологияларды енгізуді көздейді, бұл өнімділікті арттырып, шығындарды азайтуға және отандық өнімнің бәсекеге қабілеттілігін нығайтуға мүмкіндік береді. Жеке инвестициялық белсенділікті ынталандыру үшін биылдан бастап инвесторлардың шығындарын өтеу нормативі 25%-дан 40%-ға дейін артады. Бұл инвестициялық ахуалды жақсартуға және салаға қосымша қаражат тартуға ықпал етеді", - деп атап өтті Премьер-министр.
Үкімет басшысының мәліметінше, былтыр уақтылы қаржыландыру мен агротехникалық талаптардың сақталуының арқасында жоспарланған егіс көлемі толық қамтамасыз етілді. Осылайша қант қызылшасының өнімділігі екі есе артып, рекордтық көрсеткішке, яғни 1 268 мың тоннаға жетті.
