Жамбыл облысы Сарыкемер ауылындағы оқ-дәрілер қоймасы өртенді, деп хабарлайды inbusiness.kz Қорғаныс министрлігіне сілтеме жасап.
"2021 жылғы 10 қазанда сағат шамамен 7:20-да Жамбыл облысы Сарыкемер ауылындағы инженерлік оқ-дәрілер қоймасының аумағында бұрын зақымданған жарылғыш заттар өртенді. Жарылыстан оқ-дәрілердің қалдықтары мен бөлшектері жан-жаққа ұшқан жоқ", – деп жазылған хабарламада.
Оқыс оқиға жұмыстан тыс уақытта болған. Оқ-дәрілер қоймасы өртенгенде жақын маңда адамдар болмаған.
"Ғимараттар мен құрылыстарға зақым келген жоқ. Аудандағы ахуал тұрақты", – деп жазылған хабарламада.
Қорғаныс министрлігі мұндай жағдай қайталануы ықтимал екенін ескертті.
"Алдағы уақытта да мұндай жағдайлар болуы мүмкін. Қойма аумағында қауіпті оқ-дәрілердің бақыланатын жарылыстары жүргізіледі", – деп жазылған хабарламада.
Қазіргі уақытта 26 тамызда өртенген әскери қойманың техникалық аумағын жарылғыш заттардан тазарту жұмыстары жүргізіліп жатыр.
