Бүгін қатты жел салдарынан Сарысу ауданы Жаңатас қаласындағы бірқатар көпқабатты тұрғын үйдің шатыры ұшып, электр желілері бүлінді, деп хабарлайды inbusiness.kz сайты.
Анықталғандай қатты желдің салдарынан 3 үйдің шатыры толық, 7 үйдің шатыры жартылай, сондай-ақ жеті кәсіпкерлік нысанының шатыры бүлінген.
Коммуналдық желілер штаттық режимде жұмыс істеп тұр, әлеуметтік нысандарға зақым келмеген.
Аудандық деңгейде төтенше жағдай жарияланды.
"Зерделеу жалғасып жатыр. Апат салдарын жоюға тиісті қаржы қарастырылатын болады. Қажетті көмектің барлығы көрсетіледі. Зардап шеккендер жоқ", – делінген Жамбыл облысы әкімдігінің хабарламасында.
Аудан әкімдігі мен төтенше жағдай департаменті, жауапты басқармаларға қалпына келтіру жұмыстары тапсырылды. Жұмыс бүгіннен басталады.
