Жамбыл облысында аудандық полиция бөлімі қызметкерлері қылмыстық әрекетінің жолын кесілді. Бұл туралы ҚР Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров айтты, деп хабарлайды inbusiness.kz сайты.
– Жамбыл облысы бойынша Сыбайлас жемқорлыққа қарсы қызмет шекара маңындағы бір аудандық полиция бөлімі қызметкерлерінің қылмыстық әрекетінің жолын кесті. Олар жанар-жағармай материалдарын Қазақстан Республикасынан заңсыз әкетуге жол беріп, шетелдік азаматтардан материалдық сыйақы алды деген күдікке ілінді. Осы заңсыз әрекеттердің нәтижесінде көрші мемлекеттің азаматтары мұнай өнімдерінің заңсыз айналымын ұйымдастырған, – деді ол баспасөз мәслихатында.
Ресми өкілдің айтуынша, тергеу әрекеттерін жүргізу барысында, күдіктілердің бірі өңірлік Сыбайлас жемқорлыққа қарсы іс-қимыл департаментінің қызметкерлеріне қызметтік қару қолдану арқылы қарсылық көрсеткен. Тергеу жалғасуда.
