Қарағандыда жаңа жедел жәрдем станциясының ғимараты пайдалануға берілмей жатып, қайта бұзылатын болды. Мұндай шешімді Қарағанды экономикалық соты мердігер компания "ТехСтройСнаб ЛТД"-ға қатысты шығарды. Оған сәйкес, құрылыс компаниясы 9 ақпанға дейін кеткен кемшіліктерді жөнге келтіруге тиіс, деп хабарлайды Atameken Business.
Қарағанды облысының сәулет және қала құрылыс басқармасы бұл олқылықтарды әу бастан-ақ аңғарған. Алайда, мердігер ескертулерге құлақ аспай келгендіктен, сотқа жүгінген.
№ 1 қалалық аурухананың аумағында орналасқан жаңа жедел жәрдем станциясы өткен жылдың маусым айында пайдалануға берілуге тиіс еді. Ал "ТехСтройСнаб ЛТД" компаниясы нысанды салуға қатысты өткен тендерді 33% жеңілдікпен ұтып алған. Соның арқасында сметалық құны 528 млн теңгеден 353 млн теңгеге дейін төмендеген.
