Жаңаөзенде мұнай компанияларының басшылары жергілікті әкімдікпен кездесіп, жұмыссыздық мәселесін талқылады, деп хабарлайды inbusiness.kz.
Мұнай өнеркәсібіне жұмысқа орналасу мәселесі 2019 жылдан бері көтеріліп келеді. Сондықтан "ӨзенМұнайГаз" АҚ және Жаңаөзен қаласы әкімдігі бірлесе құрған алгоритмге сәйкес "ӨЗЕНИНВЕСТ" ЖШС, "Тазасу" ЖШС, "БН" ЖШС, "ӨзенМұнайГаз" АҚ компаниялары бүгінге дейін 4000-ға жуық азаматты жұмыспен қамтыған. Ал, сирек қолданыстағы мамандық бойынша 146 адам қызмет етіп жүр.
Алайда, Жаңаөзен қалалық жұмыспен қамту орталығының басшысы Ұлбазар Орынбаеваның айтуынша, алгоритмге сәйкес әлі де 9996 адам жұмысқа орналасуға кезекте тұр.
"Қазіргі таңда 9996 адам кезекте тұрғанымен оның ішінде 415 адам жеке кәсіпкер, ал 4333 адамның зейнетақы қорына аударымдары үздіксіз түсіп тұр. 2603 жұмыссыз азамат алгоритмге сәйкес кезекте тұр. Жұмысқа орналасқысы келген адам алдымен "Өзенинвест" мекемесінде уақытша қызмет етіп, аутсорсинг бойынша "ӨзенМұнайГаз" АҚ-на тұрақты жұмысқа орналаса алады",- дейді Ұлбазар Орынбаева.
"ӨзенМұнайГаз" АҚ басшысы Нұрдәулет Игілікұлының айтуынша, "ӨзенМұнайгаз" компаниясы 10 000- ға жуық адамды жұмыспен қамтып отыр. Бұдан артық адамды жұмыспен қамту компанияның экономикалық жағдайына кері әсерін тигізеді. Сол себепті "Қазмұнайгаз" ҰК АҚ Басқарма төрағасының орынбасары Дәулетжан Хасанов алдағы уақытта әлеуметтік жағдайы төмен, жұмыссыз жандарға алгоритм аясында "ӨзенМұнайГаз" АҚ компаниясына қарасты еншілес мекемелерге жұмысқа орналасуға ұсыныс білдірді.
"Қазіргі таңда жұмыссыздық мәселесі Маңғыстау облысында өзекті болып отыр. Шиеленіскен жағдайдың шешімін табу мақсатында жиын өткіздік. Бүгінгі күні қоғамда кез-келген азамат Өзенмұнайгазға жұмысқа орналысқысы келеді. Қазір ӨзенМұнайгазға қызмет көрсететін ҚазМұнайгаздың айналасында оннан астам ірі компаниялар бар. Яғни, біз 2019-жылдан бері келе жатқан алгоритмге жақсарту мақсатында толықтырулар енгіземіз. Оның орнына жұмысқа орналасуға болатын компаниялардың санын арттырамыз. Нәтижесінде бос жұмыс орындары көбейіп, жұмыссыз жандардың мәселесі шешілетін болады. Жиында жеке меншік компаниялардың 90% қолдайтынын айтты", - деді Дәулетжан Хасанов.
Айта кетейік, осы мәселені тез арада шешу мақсатында депутаттар, қоғамдық кеңес мүшелері, компания және кәсіподақ өкілдерінен тұратын жұмыс тобы құрылып, жан-жақты зерделеп шешім қабылдамақ.
