/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 440,47 Brent 36,55
Жаназа намазы мен Құдайы астарды өткізуде сақталуы тиіс талаптар жарияланды

Жаназа намазы мен Құдайы астарды өткізуде сақталуы тиіс талаптар жарияланды

Қазақстан мұсылмандары діни басқармасы COVID-19 індеті кезінде жаназа мен құдайы ас өткізуге қатысты мәлімдеме жасады.

02 Шілде 2020 21:23 505

Жаназа намазы мен Құдайы астарды өткізуде сақталуы тиіс талаптар жарияланды

Қазақстан мұсылмандары діни басқармасы жаназа намазы мен Құдайы астарды өткізуде сақталуы тиіс талаптарды жариялады, деп хабарлайды inbusiness.kz.

Аса рақымды ерекше мейірімді Алланың атымен бастаймыз!

Құрметті отандастар, қадірлі бауырлар!

Елімізді дүрліктірген індеттің қаупі күннен-күнге өршіп бара жатқаны өздеріңізге мәлім. Ауру айтып келмейді.

«Сақтансаң – сақтаймын» демекші, төрткүл әлемге қауіп төндірген дертке немқұрайлық таныту – өзіміз үшін ғана емес, жанымыздағы жандардың өміріне де әсерін тигізері хақ.

Осы орайда, Қазақстан мұсылмандары діни басқармасы еліміздің мұсылман қауымын Жаназа намазы мен Құдайы астарға қатысудың келесідей ережесін сақтауға үндейді:

Жаназа намазына қатысты талаптарды орындауға:

– Жаназа намазына бір ғана діни қызметкердің қатысуына;

– Жаназа намазына тек отбасы және жақын тумаларының қатысуына;

– Жаназаға жалпы саны 30 кісіден артық жиналмауға;

– Бойында дене қызуы немесе жөтелі бар кісінің жаназа намазына мүлде қатыспауына;

– Жаназа намазына келуші кісі міндетті түрде санитарлық нормаларды (бетперде тағу, медициналық қолғап кию және екі метрден кем емес арақашықтық) сақтауға;

Індеттен қайтыс болған мәйітті дәрігердің нұсқаулығына сай жууға;

– Жаназа намазы мен уағыздың жалпы уақытын 5 минуттан асырмауға;

– Жаназа намазы барысында қол алысып амандаспауға;

– Жаназа намазының сабын түзегенде кемінде екі метр қашықтықты сақтауға;

– Қабір басында мәйіт жер қойнына тапсырылғаннан кейін жамағатты тездетіп қайтаруға;

– Жасы үлкен кісілер, денсаулығы нашар адамдар (ер және әйел) және жас балалар жаназа намаздарына қатыспауға;

– Қонақ асын өткізбеуге;

– Жаназадан кейінгі асты өткізбеуге немесе отбасы мүшелерімен шектелуге.

Құдайы астарға (жетісі, қырқы, жүзі, жылы және тағы басқа) қатысты талаптарды орындауға:

– Астарды өткізбеуге немесе отбасы мүшелері, жақын тумаларымен шектелуге;

– Бір ғана діни қызметкердің қатысуына;

– Санитарлық нормаларды (бетперде тағу, медициналық қолғап кию және арақашықтық) сақтауға.

Құрметті жамағат!

Алла Тағала қасиетті Құранда: «Өз-өздеріңді өз қолдарыңмен қауіп-қатерге салмаңдар», – деп ескертеді. Өз өміріміз бен денсаулығымыз – Алла Тағаланың бізге берген аманаты.

Алла Елшісі (оған Алланың салауаты мен сәлемі болсын) өзінің бір өсиетінде адам баласының өзіне де, өзгеге де зиян келтіруіне қатаң түрде тыйым салған.

Шариғатта қандайда жұқпалы аурудың белгісі тараған кезде аурудың етек алуын тоқтатуда карантин қажет екені атап айтылған. Сондықтан қазіргідей көзге көрінбейтін зиянды дерт тараған кезде оның алдын алу – әрбір мұсылман баласы үшін міндет.

Құрметті, отандастар!

Сізде жөтел пайда болып, бойыңызда дене қызуының жоғарылауы байқалса немесе тыныс алу қиынға соққан жағдайда дер кезінде дәрігерге жүгінуге, сондай-ақ, қоғамдық орындарға, тіпті мешітке келуді тоқтатып, құлшылықтарыңызды үйлеріңізде орындауға кеңес береміз!

Алла Тағала елімізді, халқымызды түрлі ауру-сырқаудан сақтағай! Әумин!

Құрбандықты қашықтықтан шалуға болады

Биыл Құрбан айт 31 шілдеде басталады.

03 Шілде 2020 11:20 195

Құрбандықты қашықтықтан шалуға болады

Бұл туралы Орталық коммуникациялар қызметінде өткен брифингте ҚМДБ төрағасының орынбасары, наиб мүфти Ершат Оңғаров мәлім етті.

«Халықаралық астрономиялық институттардың болжамы бойынша, биылғы Құрбан айт 31 шілдеге сай келеді. Дегенмен, оның нақты күнін айттан 10 күн бұрын жариялап айтамыз», – деді наиб мүфти.

Бұған қоса ол Құрбан айт мейрамы кезінде қатаң шектеу шаралары сақталатын болса, айт намазы мешітте оқылмайтынын айтты.

«Естеріңізде болса, Ораза айт кезінде карантинге байланысты айт намазы оқылмаған болатын. Бұл жағдайда да шектеу шаралары созылатын болса, айт намазын өкінішке қарай мешітте оқи алмаймыз», – деген Ершат Оңғаров қазақстандықтарға құрбандықты қашықтықтан шалуға болатынын айтты.

«Құрбан айт мейрамы құрбандық шалумен ерекшеленеді. Құрбандық малын шалуды қашықтан да орындаса да, тапсырыс беру арқылы орындаса да болады. Алла қаласа, біз оған жағдай жасауға тырысамыз. Бұл ретте жергілікті әкімдік тарапынан реттеу жұмыстары жүргізіледі. Құрбандық шалу уақытына келер болсақ, биыл 31 шілде деп болжанып отыр. Сол күні таңнан бастап үш күн бойы күн батқанға дейін құрбандық шалуға болады. Шариғат құрбандық шалуды барлық адамға жүктемейді. Тек жағдайы бар адамдарға ғана құрбандық шалу міндеттеледі», – деді наиб мүфти. 

Ал Бас мүфти Наурызбай қажы Тағанұлы батаны да бармай, қашықтықтан оқып, дұға етуге боланын жеткізді.

«Қазақта бата беру деген бар. Алайда қазіргі уақытта оны қашықтықтан беруге болады. Жалпы адам өмірі сынақтардан тұрады. Адам баласы әрбір сынақты сабырмен шығарып салса барлығы жалғаса береді. Сондықтан осы сынақтан халқымыздың аман есен өтуін тілейік», – деді ҚМДБ Төрағасы.

Құралай Құдайберген

Індет белгілері бар адамдар мешітке бармауы керек – Ершат Оңғаров

«Бір адамның өміріне қиянат жасау – бүкіл адамзаттың өміріне қауіп төндірумен тең». 

03 Шілде 2020 11:00 184

Індет белгілері бар адамдар мешітке бармауы керек – Ершат Оңғаров

Орталық коммуникациялар қызметінде өткен брифингте ҚМДБ төрағасының орынбасары, наиб мүфти Ершат Оңғаров індет белгілері бар адамдар мешітке бармау керектігін мәлім етті.

«Құрметті, жамағат, сізде жөтел пайда болып, бойыңызда дене қызуының жоғарылауы байқалса немесе тыныс алу қиынға соққан жағдайда дер кезінде дәрігерге жүгінуге, сондай-ақ, қоғамдық орындарға, тіпті мешітке келуді тоқтатып, құлшылықтарыңызды үйлеріңізде орындауға кеңес береміз», – деді ол. 

Осы орайда ҚМДБ Төрағасы, Бас мүфти Наурызбай қажы Тағанұлы мұсылман дінінде бұған рұқсат берілгенін кесіп айтты.

«Бір адамның өмірін сақтап қалу – бүкіл адамзаттың өмірін сақтағанмен бірдей. Бір адамның өміріне қиянат жасау – бүкіл адамзаттың өміріне қауіп төндірумен тең, деген сөз бар. Ислам діні адамға қандай қауіп төнсе, содан қайтарған. Тіптен мешітке бару адам денсаулығына, өміріне қауіп төндірсе оған ол жерге баруға болмайды, деп дінімізде айтылған», – деді  ол. 

Құралай Құдайберген