Жапонияның Осака префектурасында болған жер сілкінісі салдарынан үш адам қайтыс болды деп, Жапония министрлер кабинетінің бас хатшысы Есихидэ Суга бұған дейін БАҚ-тың таратқан ақпаратын растады, деп хабарлайды "Интерфакс"
"Қазіргі уақытта біздің қолымызда екі адамның қайтыс болғаны туралы ақпарат бар", – деген ол, соңғы келіп түскен ақпарат бойынша қайтыс болған үшінші адамның денесі табылғанын айтты. 20 адам жарақат алған.
Қайтыс болғандар – тоғыз жасар қыз бала мен екі ер адам.
Бұған дейін Жапонияның метеорологиялық агенттігі жапондық Осака префектурасында жергілікті уақыт бойынша 08.00-де (02:00 муб) жер сілкінісі болып, оның магнитудасы 5,9-ға жеткенін хабарлаған болатын. Кейін агенттік жер сілкінісінің магнитудасы 6,1-ге дейін жеткенін мәлімдеді.
Билік өкілдерінің хабарлауынша, жер сілкінісі болған жердегі АЭС-ке зиян келмеген. Сондай-ақ БАҚ сақтық үшін Осакадағы жолаушылар пойызының қозғалысы тоқтатылғанын, Осака мен көршілес Хего префектурасында 170 мыңға жуық үй жарықсыз қалғанын хабарлады.
