Бүгін, 30 шілде күні Ресейдің Камчатка түбегінде болған қуатты жер сілкінісінен соң Жапония билігі Тынық мұхиты жағалауында цунами қаупі бар екенін айтты, деп хабарлайды inbusiness.kz сайты.
Елдің солтүстік және шығыс аймақтарында теңіз толқындарының биіктігі 50 сантиметрге дейін жеткені тіркелді. Цунами туралы ескерту теміржол және әуе қатынасын уақытша тоқтатуға, сондай-ақ "Фукусима-1" атом электр станциясынан тазартылған радиоактивті суды мұхитқа жіберу процесін тоқтатуға себеп болды.
Жапонияның метеорологиялық басқармасы Хоккайдодан бастап Вакаяма мен Огасавара аралдарына дейінгі аумақта цунами толқындарының қаупі сақталатынын ескертті.
Мияги префектурасындағы Исиномаки портында 50 см, ал Ибараки префектурасының Оараи қаласында 40 см биіктіктегі толқындар байқалды.
Елдің Премьер-министрі Сигэру Исиба барлық қажетті шаралар қабылданатынын айтып, министрліктер мен мекемелерге қауіп-қатердің салдарын азайтуды тапсырды.
Қорғаныс министрлігі жағдайды бақылау мақсатында Тынық мұхиты жағалауына барлау ұшақтарын жіберді.
