Жапония үкіметі отандық жобаға 3,3 млрд теңге қаражат бөлмек. Білім министрлігінде бұл сомаға фотоэлектрлік жүйе негізінде баламалы энергия алатын ірі орталықты іске қосуды көздеп отырғандарын айтты. Жалпы ол 2010 жылы бекітiлген. Алайда біраз уақыт тоқтап қалған.
"Жобаның басты мақсаты экологияға зияны тимейтін күн көзін тиімді ресурсқа айналдыру. Бұл күн панелдері "Назарбаев Университеті" аумағында орнатылады. Яғни, күн электр станциясы Нұр-Сұлтанда жүзеге асырылады", – деді білім министрлігі баспасөз қызметі.
Барлық үкіметаралық және өзге де келісімдерге қол қойылғаннан кейін жоба екі жыл ішінде іске қосылмақ. Станцияның жалпы қуаты 1,2 МВт-ты құрайды.
Сонымен қатар, министрлік мамандары 3,3 млрд теңгелік грант өтеусіз негізде берілетінін атап өтті.
Құралай Құдайберген
