Жетісу облысының Жаркент қаласында мектеп аумағында ойнап жүрген 5-сынып оқушысы ток соғып, көз жұмды, деп хабарлайды inbusiness.kz сайты.
Алдын ала мәлімет бойынша, оқиға 9 шілдеде 10 жасар қыз есігі құлыпталмаған трансформаторлық қосалқы станцияға кірген.
Ток соққан оқушы Жаркент қалалық ауруханасының жансақтау бөліміне жеткізілгенімен, дәрігерлер оның өмірін сақтай алмады.
– Қауіпсіздік талаптарына сай келмейтін жұмыстарды орындау немесе қызмет көрсету дерегі бойынша сотқа дейінгі тергеу жүргізіліп жатыр, – деп хабарлады Жетісу облыстық полиция департаментінің баспасөз қызметі.
Құқық қорғау органдары нысанды пайдалану мен оның қауіпсіздігіне жауапты лауазымды тұлғалардың жауапкершілік деңгейін анықтайтынын хабарлады.
Оқиғаның барлық мән-жайын жан-жақты зерттеуге бағытталған тергеу әрекеттері жалғасуда. Тергеу мүддесіне байланысты өзге ақпарат әзірге жарияланбайды.
