Астанадағы жәрмеңкеде Оңтүстік Қазақстан, Атырау мен Батыс Қазақстан облыстарының тауар өндірушілері қала тұрғындары мен қонақтарына түрлі ауыл шаруашылығы өнімдерін ұсынды.
Жәрмеңкеге шамамен 40,5 т - ет өнімдері, 177,5 т - көкеніс, 2,7 т - сүт өнімдері, 10 мың дана құс жұмыртқасы, 13 тонна балық, 2 т шұжық өнімдері әкелінді. Мұндағы баға базар бағасынан 15-20%-ға төмен болды.
Жәрмеңкеге үш облыстың ауыл шаруашылығы құрылымдары мен 190 қайта өңдеу кәсіпорындары қатысты.
Естеріңізге сала кетейік, Астанадағы Қазақстан аймақтарының ауыл шаруашылығы өнімінің жәрмеңкесі "ЭКСПО-2017" көрмесі аясында өткізілуде.
Алдағы уақытта, 27-28 мамырда астаналықтарға Атырау мен Оңтүстік Қазақстан облыстарының ауыл шаруашылығы тауарын өндірушілері өз өнімдерін ұсынады. Жалпы, 200-ден астам ауыл шаруашылығы өнімінің жәрмеңкесін өткізу жоспарланған.
