Денсаулық сақтау министрлігінің жауапты хатшысы Ботагөз Жақселекова карантин шаралары енгізілгеннен кейінгі уақыттағы індет таралуының қарқыны жайлы айтып өтті.
"Елде індеттің таралу екпіні 29 наурыз күні 24% болған. Бүгінгі күні бұл көрсеткіш 7%-ға дейін түсті. Бұл қатаң карантин шараларын енгізудің нәтижелі екенін білдіреді. Шектеу шараларының енгізілуіне байланысты соңғы күндері Алматы және Нұр-Сұлтан қалаларында аурудың төмендеу динамикасы байқалды. Коронавирус инфекциясының таралуы Нұр-Сұлтан қаласында 4 сәуірден бері 8,4%-дан 0,9%-ға дейін төмендесе, Алматыда 15%-дан 2,5%-ға дейін азайды. Аптаның басынан бері осы қалаларда тек 6 жаңа жағдайдан тіркелді", – деп айтып өтті жауапты хатшы.
Дегенмен Ботагөз Жақселекованың сөзінше, елімізде КВИ таралуының шарықтау шегі әлі алда.
"Еліміз індет таралуының ең үдемелі кезеңінен әлі өткен жоқ. Алматы мен Нұр-Сұлтанда карантин шараларын күшейту арқылы коронавирус инфекциясы айтарлықтай азайды. Жалпы елде індет таралуының шарықтау шегі алдағы 1-2 аптада болады деп күтілуде", – деді денсаулық сақтау министрлігінің жауапты хатшысы.
Нұржан Көшкін
