Желіде домбыраны "харам" деп айтқан Ақтөбе қаласының тұрғыны ұсталды, деп хабарлайды inbusiness.kz сайты.
"Құрметті Қазақ елі, домбыраға қарсы сөйлеген болсам, кешіріп қойыңыздар. Қазақстан ханафи мазхабын ұстанатындықтан, шариғат бойынша ішекті аспаптар, гитара, домбыра – бәрі "харам" болып есептеледі", – деді ер адам желіде тараған бейнежазбада.
Ақтөбе облысы Полиция департаменті жергілікті тұрғынға қатысты діни араздықты қоздыру фактісі бойынша қылмыстық іс қозғалғанын хабарлады.
"Тергеу дерегіне сәйкес күдікті әлеуметтік желілерде діни негіздегі араздық пен өшпенділікті қоздыруға бағытталған пікір жариялаған. Жедел іздестіру іс-шаралары барысында ол ұсталып, уақытша ұстау изоляторына қамалды", – делінген хабарламада.
Сот санкциясымен қамауда ұстау түріндегі бұлтартпау шарасы таңдалды.
