Астана әкімі Әсет Исекешев жеңілдік категориясындағы азаматтардың арнайы көлік картасын алуына берілген мерзімді 1 шілдеге дейін ұзартты, деп хабарлайды Астана LRT.
Қоғамдық көлікте жолақысын төлеудің электронды жүйесі енгізілгелі бері Астанада тіркелген жеңілдік иелері автобуспен тегін қатынау үшін арнайы көлік картасын алуға тиіс.
Қазірде 88 мың жеңілдік иесі карталарына қол жеткізді. Бірақ әлі 28 мың адам арнайы көлік картасын алмаған.
"Осыған байланысты Астана әкімі Әсет Исекешев жеңілдік иелерінің көлік картасын алу мерзімін 2018 жылдың 1 шілдесіне дейін ұзартты. Атап өтсек, бұдан кейін бұл мерзім ұзартылмайды", — деп мәлімет берді компания.
Естеріңізге сала кетсек, бейсенбі күні баспасөз мәслихатында әкім хабарлағандай, Астанада шілденің ортасынан бастап жаңа дифференциалды тариф енгізілмек. Электронды көлік картасын пайдаланатындар 90 теңгемен жүрсе, ақшалай төлейтіндерге жолақы екі есе қымбат болады — 180 теңге.
