Мәдениет және ақпарат вице-министрі Евгений Кочетов Ұлы Жеңістің 80 жылдығына арналған парадты өткізу күніне қатысты пікір білдірді, деп хабарлайды inbusiness.kz сайты.
Журналистер парад неге 9 мамырда емес, 7 мамырда өтетінін нақтылады.
"Парадты 7 мамырда өткізу орынды. 7 мамыр – біздің ұлттық мерекеміз, Қарулы Күштердің құрылған күні. Осыған дейінгі шерулер де дәл осы күні, яғни 7 мамырда өтетін. Сондықтан бұл датаның таңдалуы осы күні ұлттық мерекеміз екендігіне байланысты. Ол 9 мамыр қарсаңына сәйкес келіп отыр", - деді вице-министр Үкімет отырысынан кейінгі брифингте.
Айта кету керек, осыған дейін Қорғаныс министрлігі Қазақстан халқына маңызды үндеу жасағанын жазғанбыз. 22 сәуір мен 7 мамыр аралығында әскери авиацияның жаттығу ұшуларын жүргізу үшін Астана қаласында әуе кеңістігін пайдалануға қысқа мерзімді шектеулер қойылады. Осыған байланысты әуе рейстерінің кестесіне де өзгерістер енгізілуі мүмкін.
