Қазақстандықтар салықты E-salyq Azamat, Kaspi.kz және Homebank мобильді қосымшалары арқылы төлей алады, деп хабарлайды inbusiness.kz.
Мемлекеттік кірістер комитетінің мәліметінше, өткен жылғы мүлік салығын төлеу мерзімі 2021 жылғы 1 қазанда аяқталады.
"Салықтың сомасын E-salyq Azamat мобильді қосымшасы және kgd.gov.kz "Алдағы төлемдер" сервисінен білуге болады. Сондай-ақ тұрғындар E-salyq Azamat, Kaspi.kz және Homebank мобильді қосымшалары арқылы салықты төлей алады", - деп жазылған хабарламада.
Айта кетейік, Салық заңнамасына енгізілген өзгерістерге сәйкес 2020 жылғы 1 қаңтардан бастап жеке тұлғалардың меншік құқығына тиесілі жер учаскелері және жылжымайтын мүлік бойынша салығы біріктірілді. Осыған байланысты салықтың есептелген сомасы жылжымайтын мүлік пен жер учаскесі бойынша бірыңғай сомамен төленеді.
