Спорт басқармасының басшысы Нұрбақыт Теңізбаевтың айтуынша, "Жетісу" командасы бүгінге дейін өткізген ойындарының қорытындысы бойынша турнир кестесінде соңғы орында тұр. Алда тағы 4 ойын өткізеді. Дегенмен бұл ойындардың нәтижесі көп нәрсе өзгерте алмайтын сыңайлы. Бірақ команда футболшылары 4 ойынның әрқайсысына бар күш-жігерін жұмсайтын болады.
"Кәсіби клубтардың бюджетін азайту, легионерлер санын кемітіп, жергілікті футболшыларды тарту сияқты өзгерістерді Қазақстандағы барлық клубтар бірдей басынан өткерді. Сондықтан – ол себеп емес. Мәселе – футболшыларымыздың жеңілісінде де емес, олар барын салып ойнады. Мәселе – клуб басшылығының жауапсыздығында, тактикалық, стратегиялық жоспарларының жоқтығында. Әрбір ойыннан кейін басшылық ретінде жиын өткізіп, жоспар-есептерді қайта қарап, талқылау жасап, турнир кестесіндегі жағдайға байланысты түбегейлі шара қабылдауларың керек еді. Қазақстан чемпионаты аяқталсын, Жетісу футболындағы жағдай үшін барлығың да жауап бересіңдер", – деді Амандық Баталов спорт саласының мәселелері бойынша өткізілген жиында.
Атап өтсек, "Жетісу" футбол клубының жаңарған құрамында 15 ойыншы – облыстың жас түлектері, 5-еуі – қазақстандық футболшы, 7 спортшы – легионер. Әзірге "Жетісу" футбол командасы турнир кестесінде соңғы орында тұр.
