Жетісу облысындағы Текелі қаласында жас құтқарушылардың кадет сыныбы ашылды, деп жазады inbusiness.kz.
Облыстық әкімдіктің ақпаратына сәйкес, кадеттер қатары Текелі қаласының № 4 орта мектебінің оқушыларымен, яғни 30 ұл-қызбен толықты. Кадет куәлігін алған оқушылар ант қабылдады.
Облыстық ТЖД бастығы Бауыржан Ізбасаровтың сөзінше, тәжірибелі құтқарушылар оқушыларға түрлі сабақтар өткізеді.
"Кадет сыныбының оқу бағдарламасына негізінен әскери-медициналық дайындық, өртке қарсы қолөнер, сап дайындығы, денені тік ұстауға бейімдейтін хореография сабақтары енгізіледі. Сол сияқты балалар шахмат ойнауды да меңгереді. Қаламыздың ерекшелігін ескеріп, туризм негіздеріне де оқытамыз", - деді №4 мектеп директоры Меруерт Бюрина.
Облыстық ТЖД өңірде жаңа кадет сыныптарын ашу әрі қарай жалғасатынын мәлімдеді.
