Қаратал ауданының прокуратурасы денсаулық сақтау мекемелеріне тексеру жүргізді. Тексеру барысында медицина саласындағы заң талаптарының сақталуы қаралды. Нәтижесінде тиісті сертификаты мен медициналық қызмет көрсетуге лицензиясы жоқ мамандардың халыққа қызмет көрсеткені анықталды.
– Аудандық прокуратураның қадағалау актілері бойынша, ӘҚБтК-нің 424-баптың 1-бөлігі, 426-баптың 1-бөлігі және 464-баптың 1-бөлігі бойынша 20 адам әкімшілік жауаптылыққа тартылды, оның ішінде 3 басшыға — орталық аудандық аурухананың бас дәрігері және оның орынбасарларына 4 049 960 теңге мөлшерінде әкімшілік айыппұл салынды. Сонымен қатар тексеру аясында 4 жауапты тұлға (ауылдық аурухана басшылары) медицина қызметкерлерінің халықты вакцинациялау ережелерін бұзғандықтары үшін ӘҚБтК-нің 425-бабының 1-бөлігі бойынша 157 280 теңге көлемінде айыппұл түріндегі әкімшілік жауаптылыққа тартылды, – делінген ведомство хабарламасында.
Осы тексерумен 148 адамның құқығы қорғалды, оның 100-ден астамы кәмелетке толмаған балалар. Қадағалау актісі бойынша бюджетке 12,8 млн теңге қайтарылды.
