Жетісу облысында прокуратураның араласуынан кейін мемлекеттік инвестициялық жоба бойынша шарт құны 85,1 млн теңгеге төмендетілді, деп хабарлайды inbusiness.kz сайты.
Талдықорған қаласының прокуратурасы мемлекеттік инвестициялық жобаларға бөлінген бюджет қаражатының тиімді жұмсалуына талдау жүргізген. Нәтижесінде қаладағы магистральдық жылу желілерін реконструкциялау жобасында жұмыс құнының негізсіз ұлғайтылғаны анықталды.
Сметалық құжаттаманы әзірлеу кезінде алынатын асфальтобетон массасын есептеуде қате кеткен. Атап айтқанда, алынатын қабаттың қалыңдығы ескерілмеген.
Соның салдарынан шығарылуға тиіс қалдық көлемі нақты 5 273,7 тонна орнына 105 474 тонна деп көрсетілген. Яғни көрсеткіш шамамен 20 есеге артық есептелген.
Прокурорлық қадағалау актісі қаралғаннан кейін шарт құны 85,1 млн теңгеге төмендетілді. Осылайша, бюджет қаражатының негізсіз жұмсалуына жол берілмеді.
Жалпы Жетісу облысында прокурорлық қадағалау шаралары арқылы бюджет қаражатының 1,2 млрд теңгеден астам сомасының негізсіз жұмсалуына жол берілмеген.
Облыс прокуратурасы бюджет қаражатын тиімді пайдалану және негізсіз шығыстарға жол бермеу бағытындағы жұмысты жалғастырады.
