Оған облыс әкімі Бейбіт Исабаев, ардагелер, зиялы қауым өкілдері, мемлекеттік қызметшілер, депутаттар, жастар және басқа да түрлі сала қызметкерлері, жалпы саны мың шақты адам қатысты, деп хабарлайды inbusiness.kz сайты Жетісу облысы әкімінің баспасөз қызметіне сілтеме жасап.
Алдымен Жетісу облыстық филармониясының,"Талдықорған әуендері" фольклорлы-этнографиялық ансамблінің өнерпаздарымен және жоғары сынып оқушыларының хорымен бірге акцияға қатысушы барша жұртшылық Мемлекеттік әнұранды орындады.
Осы мезетте еліміздің Мемлекеттік туы көкке көтерілді. Атап өтсек, Ту тұғырының биіктігі 92 метр, Тудың ұзындығы – 25 метр, ені – 12,5 метр.
Мұнан соң жергілікті өнер ұжымдары мен әртістері патриоттық мазмұндағы әндерді шырқады.
Бүгінгі шараға қала тұрғыны Лидия Маринина 2 кішкентай ұлын ертіп келген.
– Балаларым әзірге мектеп жасына жеткен жоқ, бірақ осындай кішкентай кезінен бойларына патриоттық сезімді сіңіру керек деп есептеймін. Бүгін сол үшін оларды саябаққа ертіп келдім. Республика күніне арналған салтанатты көріп, көпшілікпен бірге мерекені атап өттік, – дейді ол.
Ал зейнеткер Мәрия Омарова осындай іс-шара өтетінін әлеуметтік желіден оқып-білген.
– "Жастар" саябағына Мемлекеттік әнұранымызды шырқауға, Туымыздың көкке көтерілгенін көруге келдім. Осында келген елжанды жастарды көріп, көңілім қуанды. Еңселі елім бар болғанына, жайқалып өсіп келе жатқан ұрпақтарымыздың бар екеніне риза сезімде болдым, – деді ол.
