Жезқазған қаласында түнгі уақытта пиротехникалық бұйымдарды қолданып, тұрғындардың тыныштығын бұзған азамат полиция назарына ілікті, деп хабарлайды inbusiness.kz сайты.
Жезқазған қаласы полиция басқармасының қызметкерлері түнгі сағат 01:00 шамасында пиротехникалық бұйымдарды пайдаланған тұрғынды анықтады. Оның әрекеті салдарынан түнгі тыныштық бұзылған.
Полиция қызметкерлері құқық бұзушыға қатысты әкімшілік хаттама толтырып, заңнамаға сәйкес жауапкершілікке тартты.
Құқық қорғау органдары түнгі уақытта тұрғындардың тыныштығын бұзуға жол берілмейтінін еске салды. Әсіресе пиротехникалық бұйымдарды белгіленбеген уақытта және талаптарды сақтамай пайдалану азаматтардың қауіпсіздігіне қауіп төндіріп қана қоймай, әкімшілік жауапкершілікке де әкелуі мүмкін.
Полиция тұрғындарды қоғамдық тәртіпті сақтап, айналадағы адамдардың тыныштығына құрметпен қарауға шақырды. Сондай-ақ пиротехниканы қолдану кезінде қауіпсіздік талаптарын қатаң сақтаудың маңызын ескертті.
