Ақмола облысының әкiмдiгi мен "ҚазАвтоЖол" ҰК" бiрлесiп аймақта жол бойында сервистiк қызмет көрсететiн 22 жобаны жүзеге асыруды көздеп отыр. Бұл туралы аймақ басшысы Мәлік Мырзалин мен "ҚазАвтоЖол" ҰК" басқарма басшысы Ермек Қизатовтың кездесуі барысында белгілі болды, деп хабарлайды strategy2050.kz.
Ақмола облысы әкімдігінен хабарлағандай, тараптар алдағы туристiк мауысымға дайындық мақсатында жол бойындағы сервистi дамыту бағытында туындаған мәселелердi талқылады.
"Щучъе-Бурабай курорттық аймағында, облыс орталығының кiре-берiсiнде, Көкшетау-Зерендi, Көкшетау–Рузаевка бағыттарында жүргiзiп жатқан жөндеу жұмыстарына облыс тұрғындары тарапынан оңтайлы пiкiрлер түсiп жатыр, бұл жұмыстар әрине аймақтың туристiк әлеуетiн арттыруға септiгiн тигiзетiнi сөзсiз. Ендi, жол бойындағы қызмет сапасын арттыруға ден қою қажет",- дедi М. Мырзалин.
Өз кезегiнде, Ермек Қизатов өткен жылдан бастап "ҚазАвтоЖол" ұлттық компаниясы жол бойындағы сервистiк қызмет көрсету сапасын арттыру бағытында бiршама жұмыстар жасалғанын баяндады.
Атап өтейiк, Ақмола облысының әкiмдiгi мен "ҚазАвтоЖол" ҰК" бiрлесiп, жол бойындағы сервистi дамыту мақсатында Астана-Бурабай трассасы бойында 3 жобаны жүзеге асыруда. Тағы екi жоба Арлашы және Торғай елдi мекендерiнде iске қосылады. Яғни бұл сервистерде тәулiк бойы жұмыс iстейтiн асхана, қонақ үй, автотұрақ болады.
Бүдан басқа, кездесуде тараптар, келесi туристiк мауысым алдында Ақмола облысы аумағында 9 модульдiк павильон орналастыру туралы өзара келiсiмге келдi. Яғни бұл кешендердiң төртеуi Астана-Бурабай трассасы бойында, екеуi Щучъе-Бурабай курорттық аумағында қойылатын болады. Қалғаны, өзге республикалық маңызы бар трассалар бойында орналастырылады.
