Қазіргі уақытта жүргізуші жұмыстан шеттетілді. Атқаратын қызметінен босату туралы шешімді автопарк басшылығы қабылдайды. Бұл туралы әкімдікте өткен баспасөз мәслихатында "Астана LRT" ЖШС көліктік бақылау департаментінің директоры Самат Шәймерденов айтты, деп хабарлайды Елорда Инфо.
Жол-көлік оқиғасынан зардап шеккен қыз №2 қалалық ауруханада "Бассүйек-ми жарақатының жабық түрі" диагнозымен жатыр.
"Әрбір жайтты толықтай қарастыру қажет. Неліктен мұндай жағдай орын алды? Артық жұмыс істеді ме, жай-күйі қандай болды дегеннен бастап сол уақыттағы отбасылық жағдайын да білу керек. Ішкі-сыртқы барлық аспектілердің мән-жайын анықтау қажет", - деді "Астана LRT" ЖШС басшысы Бекмырза Игенбердинов.
Сондай-ақ, жол-көлік оқиғасын жасаған жүргізушілердің "қара тізімге" енгізілетіндігі айтылды.
"Біздің жүргізушілер құрамының арасында осындай тізім бар. Ондай жүргізушілерді басқа автопарктер жұмысқа қабылдамайды", - деді Самат Шәймерденов.
Айта кетейік, 20 желтоқсан күні елордада №54 бағыттағы автобус жаяу жүргіншілер жолындағы қызды қағып кеткен болатын.
