Бұл туралы Көлік министрі Марат Қарабаев Үкімет отырысында айтты.
"Жол инфрақұрылымын дамыту – ел экономикасының өсуінің алғы шарттарының бірі. Биыл, Қазақстан бойынша барлығы 10 мың 700 шақырым жол құрылыс-монтаждау жұмыстарымен қамтылған, оның ішінде:
- 6 мың 500 шақырым республикалық және 4 мың 200 шақырым жергілікті маңыздағы жолдар. Жүргізілген жұмыстардың нәтижесінде нормативтік жағдайдағы жолдардың үлесі республикалық желіде 92 пайызға, жергілікті желіде 87 пайызға дейін жететін болады", – деді министр.
Қазіргі таңда, республикалық жолдардың 3 мың 600 шақырымында құрылыс жұмыстары жүргізілуде. Оның 856 шақырымы толық аяқталды.
2 мың 900 шақырым жол күрделі және орташа жөндеумен қамтылып, (күрделі жөндеу – 700 шқ, орташа – 2 200 шқ) 1 мың 100 шақырымы пайдалануға берілді (күрделі – 200 шқ, орташа – 900 шқ).
"2023 жылы 16 ірі жоба іске асырылуда, оның үшеуінде жұмыстар толығымен аяқталды, атап айтқанда Үлкен Алматы айналма жолы, Қандыағаш-Мақат және Үшарал-Достық жолдары. Биыл, халықтың шағымдарын ескере отырып, барлық күш 4-5 жыл бұрын басталып, құрылысы ұзаққа созылған 6 негізгі жобаны жүзеге асыруға бағытталды. Бұл – Талдықорған-Өскемен, Қарағанды-Алматы, Мерке-Бурылбайтал, Ақтөбе-Қандыағаш және Атырау-Астрахань жолдары болып табылады", – деді ведомство басшысы.
Оның айтуынша, Батыс Қазақстан облысындағы күрделі жөндеу жұмыстарына ерекше назар аударылуда. Өңірде жалпы ұзындығы 245 шақырым болатын Казталов-Жәнібек және Өнеге-Бисен-Сайқын жолдары жөнделуде, оның 220 шақырымында қозғалыс қамтамасыз етілген, жобаларды толық аяқтау 2024 жылға жоспарланып отыр.
