Алматыда "Автобус" жедел-профилактикалық шарасы жалғасып жатыр. 4 күн ішінде құқық қорғау органының өкілдері 700-ге жуық заңбұзушылықты әшкереледі, деп хабарлайды ҚазАқпарат.
"Жүргізілген рейд барысында техникалық ақауы бар 10 автобусты айып тұрағына қойдық. Осыған байланысты автокәсіпорындардың 8 жетекшісі әкімшілік жазаға тартылды. Сондай-ақ, бір адам көлік басқаруға құқығы болмаса да автобус жүргізгені белгілі болды. Тағы да 4 Өзбекстан азаматы автобуспен жолаушыларды тасымалдаумен айналысқан. Олардың көлік басқармақ түгіл Қазақстан территориясында тұруға рұқсаты жоқ болып шықты", - деді қалалық ІІД басқармасының басшысы Жандос Мұратәлиев.
Оның айтуынша, мұндай жауапсыздық қоғамдық көліктердің қауіптілігін арттыра түседі. "2017 жылдың басынан бері автобустар 78 рет жол апатына түскен. Жол апатынан 4 адам қаза болған, 115 адам жараланған. Автобус жүргізушісінің кесірінен 57 жол апаты болса, оның салдарынан 2 адам қаза болып, 67 адам жараланды", - деді ол.
Айта кету керек, Алматыда қазіргі таңда 21 автокәсіпорын бар. 1800 автобус 112 маршрутта жолаушыларды тасымалдайды.
