Орталық коммуникациялар қызметінде өткен брифингте Ақпарат және қоғамдық даму министрі Аида Балаева дін саласы туралы да сөз қозғады.
Министрдің сөзінше биыл ведомство осы бағытта алдына 3 өзара байланысты міндет қойған. Олар: халық арасына зайырлы мемлекет құндылықтарын насихаттау, дінаралық келісімді сақтау, діни экстремизмді болдырмау.
"Бұларды жүзеге асыру үшін ақпараттық-түсіндіру жұмыстары, деструктивті діни көзқарастағы азаматтарды райынан қайтару және интернет арқылы діни экстремизм идеологиясына қарсы жұмыстар сынды шаралар қарастырылған. 2019 жылы ақпараттық-түсіндіру топтарының күшімен 3 млн-ға жуық адамды қамтыған 50 мыңнан аса іс-шара өтті. Дін саласы бойынша көпшілікті толғандырған сауалдарға жедел жауап беру үшін 300 адамнан тұратын білікті лекторлар тобы құрылды. Осы жылы біз бұл топтардағы мамандардың санын 500-ге дейін арттырып, 1200 лекторды қайта даярлықтан өткізуді жоспарлап отырмыз", – деген министр Жусан операциясымен елге оралған қыз-келіншектерге тоқталды.
"Жусан операциясы аясында террористік белсенділік аймағынан қайтарылған 163 әйелді қайта әлеуметтендіру бойынша кешенді алдын алу жұмыстарын жүргізуге ерекше назар аударылды. Бүгінгі таңда олардың 144-і радикалды діни көзқарастардан бас тартты, ал кейбіреулері зайырлы өмір салтына толығымен көшті", – деді министр.
Сонымен қатар министрлік 2019 жылы діни экстремизм идеологиясын қарсы насихаттау аясында 5,3 мыңнан астам интернет-ресурстардың мазмұны талдаған. Оның 3,2 мыңы заңға қарсы сипаттағы материалдарды қамтығандықтан, дер кезінде бұғатталған.
Құралай Құдайберген
Фото: nuz.uz
