Үш айда 86 пара беру фактісі анықталды. Бұл туралы ҚР Сыбайлас жемқорлыққа қарсы іс-қимыл агенттігінің аппарат басшысы Қуаныш Жапақов онлайн-брифинг барысында мәлімдеді.
"2017-2019 жылдар аралығы мен 2020 жылдың үш айында пара беру фактісі бойынша 915 қылмыс тіркелді. Соңғы жылдардағы көрсеткіштер жемқорлыққа қатысты қылмыстардың артқанын көрсетеді. Мысалы, 2017 жылы – 255 жағдай, 2018 – 232 жағдай, 2019 жылы – 342 жағдай және соңғы үш айда 86 факт тіркелді", – деді Қуаныш Жапақов.
Сонымен қатар осы аралықта аталған факт бойынша 147 адам бас бостандығынан айырылса, 352 адамға айыппұл салынған. Бұл ретте Сыбайлас жемқорлыққа қарсы іс-қимыл агенттігінің аппарат басшысы парақорлық жайында ақпарат берген тұлғаларға бір реттік сыйақы қарастырылғанын айтты.
"2020 жылдың өткен үш айында жемқорлық фактісі туралы ақпарат берген 44 адам сыйақы алды", – деді ол.
Құралай Құдайберген
