Ішкі істер министрлігі "Заң мен Тәртіп" қағидаты бойынша есірткі қылмысына қарсы күресті жалғастыруда, деп хабарлайды inbusiness.kz сайты.
"4 айда 3 мыңға жуық есірткі құқық бұзушылығы анықталды. Оның ішінде 828 сату фактісі бар. Заңсыз айналымнан шамамен 3,5 тонна есірткі тәркіленді: 259 келі синтетика, 2 тоннаға жуық марихуана, 303 келі гашиш. 83 есірткі зертханасы жойылды. 6 тоннаға жуық прекурсор тәркіленді. 20 ұйымдасқан қылмыстық топтың жолы кесілді. Заңсыз контенті бар 11 мыңнан астам сайт, сондай-ақ 1 млрд теңгеден астам сомаға 12 мың банк картасы мен шот бұғатталды. 1783 адам ұсталды, оның 669-ы қамауға алынды", - деді ІІМ есірткі қылмысына қарсы іс-қимыл комитеті төрағасының міндетін атқарушы Данияр Мейірхан.
Спикердің сөзінше, сәуір айында бірқатар сәтті операция жүргізілді. Қосшы қаласында Ақмола облысының тумасы ұсталды.
Оның автокөлігінен 6,5 келі a-рvр синтетикалық есірткісі тәркіленді. Одан кейін жүргізілген іс-шаралар барысында басқа да күдіктілер – Солтүстік Қазақстан облысының тұрғындары ұсталды. Олардан тағы 1 келі синтетика тәркіленді.
Астана қаласында Ақтөбе тұрғыны ұсталды. Одан 2,5 келі синтетикалық есірткі тәркіленді.
"Барлық күдікті уақытша ұстау изоляторына қамалды. Бұл бағыттағы жұмыс жалғасуда", - деді Данияр Мейірхан.
