Бұл туралы Үкімет отырысында Ұлттық экономика вице-министрі Азамат Әмрин айтты, деп жазады inbusiness.kz.
"Биылғы қантар-тамыз айларының қорытындысы бойынша Қазақстан экономикасының өсу қарқыны 4,9%-ды құрап отыр. Оның ішінде нақты сектор – 4,4%, ал қызмет көрсету саласы 4,8%-ға өсті. Негізгі салалардың барлығында оң динамика байқалуда, әсіресе құрылыс, сауда, сондай-ақ ақпарат және байланыс ең жоғары өсуді көрсетті", - деді ведомство өкілі.
Оның сөзінше, негізгі капиталға салынған инвестициялардың өсу қарқыны 12,2%-ды құраған. Инвестициялар ағыны көлік және қоймалауда – 49%, білім беруде – 31,9%, саудада – 30,1%, ауыл шаруашылығында – 20,7%, сондай-ақ өнеркәсіпте – 8,5%, оның ішінде тау-кен өндіру өнеркәсібінде 5,7%-ға өсті.
"Өңірлер арасында ең жоғарғы өсім Маңғыстау, Абай, Түркістан және Павлодар облыстарында тіркелді. Алдын ала қорытынды бойынша 2023 жылғы қаңтар-шілде аралығында сыртқы сауда тауар айналымы 5,7%-ға артып, 79,5 млрд долларды құрады. Экспорт 44,8 млрд долларды құрап, оның ішінде өңделген тауарлар экспорты 14,2 млрд долларға жетті. Тауарлар импорты 34,7 млрд долларды құрады", - деп атап өтті вице-министр.
Елдегі оң сауда балансы 10 млрд долларға тең. Ұлттық экономика вице-министрінің айтуынша, өңдеу өнеркәсібінде де оң өсім сақталып отыр. Өндіріс көлемі 3,1%-ға өсті.
