Жалпы, халықаралық резервтер қазан айының соңында 90,3 млрд доллар болды. Бұл туралы Ұлттық Банк төрағасының орынбасары Данияр Вагапов Үкімет отырысында мәлімдеді, деп хабарлайды inbusiness.kz сайты.
"Ұлттық Банктің алтын-валюта резервтері жыл басынан 34,0 млрд долларға дейін 3,1%-ға төмендеді. Бұл Ұлттық Банктің валюталық шоттарындағы екінші деңгейлі банктер қаражатының азаюына байланысты. Оған Қаржы министрлігінің міндеттемелерін төлеу мақсатында алтын-валюта резервтерін конвертациялау да себеп болды", - деді ол.
Спикердің айтуынша, Ұлттық қордың активтері жыл басынан 56,3 млрд долларға дейін 1,1%-ға өсті.
"Оған инвестициялық табыстың артуы бірден-бір себеп болды. Ол жыл басынан 3,3% немесе 1,83 млрд доллар. Жыл басынан қорға түскен түсімдердің барлығы 3,6 трлн теңгені құрады", - деп атап өтті Данияр Вагапов.
Бұдан бөлек, ол Ұлттық қордан республикалық бюджетке 3,7 трлн теңге трансферттер бөлінгенін жеткізді.
