Қызмет көрсету саласында өсім баяулағандықтан, жаһандық экономикалық белсенділік бәсеңдей бастады. Бұл туралы Ұлттық Банк төрағасының орынбасары Данияр Вагапов айтты, деп хабарлайды inbusiness.kz сайты.
"Елімізде іскерлік белсенділік индексі қазанда 49-дан 49,6-ға дейін жақсарды. Өндірістегі жақсару көрсеткіші 51,6-ға дейін барды. Бизнес-климат индексі ұлғайды. Оған болашақ бизнес-жағдай бойынша кәсіпорындар тарапынан болған күтулердің жақсарғаны әсер етті. Барлық секторда индекс оң қалпында қалды", - деді ол Үкімет отырысында.
Данияр Вагаповтың сөзінше, жылдық инфляция 10,8%-ке дейін баяулады.
"Десек те, бағаның өсуі екі таңбалы мәнде қалып отыр. Айлық инфляция өткен айдың деңгейінен және таргеттен жоғары қалыптасып, 0,7%-ды құрады. Бұл инфляцияға қарсы саясатты одан әрі жалғастыруды талап етеді", - деп түсіндірді ол.
Ұлттық Банк төрағасы орынбасары азық-түлік инфляциясы жылдық мәнде 10,4%-ға дейін баяулағанын, оның айлық мәні өткен айдағы 0,3%-дан 0,5%-ға дейін қарқын алғанын баса айтты.
Спикер келтірген мәліметтерге сүйенсек, азық-түлік тауарлары құрылымында қазан айында жұмыртқа, нан, жарма, қант және тәттілер, жаңа піскен жемістер мен ет бағасы өсті. Ал ірімшік, жаңа піскен көкөніс пен күнбағыс майы арзандаған.
