Үкімет отырысында Ұлттық экономика министрі Әсет Ирғалиев елімізде жылдық инфляция 7,4% деңгейінде сақталғанын айтты, деп хабарлайды inbusiness.kz тілшісі.
Министр Премьер-министр Асқар Маминге 2021 жылдың қаңтар-ақпандағы әлеуметтік-экономикалық дамуының қорытындысы туралы есеп берді.
Оның айтуынша, көптеген елде коронавирусқа қарсы белсенді вакцина жүргізу нәтижесінде әлемде эпидемиологиялық ахуал жақсарған. Тәулігіне коронавируспен ауырғандар саны 2021 жылғы қаңтардың ортасымен салыстырғанда 46%-ға, ал Қазақстанда 59%-ға төмендеген.
"Эпидемиологиялық ахуалдың жақсаруы нәтижесінде іскерлік белсенділік қалпына келді",– деді Әсет Ирғалиев.
Министр халықаралық рейтинг агенттіктері 2021 жылы Қазақстанның жалпы ішкі өнімінің өсуін (ЖІӨ) 3,2-3,8% деңгейінде болады деп болжап отырғанын атап өтті.
"Осы жылдың қаңтар-ақпанда макроэкономикалық көрсеткіштер оң үдеріс көрсетті. Кен өндіру өнеркәсібін есепке алмағанда, нақты секторда өсу 6,3%-ға дейін жеделдеді. Негізгі капиталға салынған инвестициялар кен өндіру есепке алмағанда 3,3%-ға өсті. Жылдық инфляция 7,4% деңгейінде сақталды",– деді ведомство басшысы.
Ол кен өндіру өнеркәсібінен басқа нақты сектордың барлық саласы:
құрылыс, сумен жабдықтау, өңдеу өнеркәсібі, электрмен жабдықдықтау және ауыл шаруашылығы тұрақты өсім көрсеткенін жеткізді. Ал ақпарат пен байланыс саласы 9,4%-ға өсім көрсеткен.
Дәурен Ерболат
