Министрдің мәлімдеуінше, алдағы жылыту маусымына 65 мыңнан астам әлеуметтік сала нысанын дайындау қажет, деп хабарлайды inbusiness.kz.
Бейбіт Атамқұловтың айтуынша, жылыту маусымына әзірлікті қажет ететін 6 мың денсаулық сақтау, 11,2 мың білім беру нысаны, 47,6 мың тұрғын үй бар. Бұған қоса 11 мың автономды қазандықты және 19 мың шақырым инженерлік желіні қалыпқа келтіру қажет.
"5 мың шақырым жылумен жабдықтау желісін, 14,2 мың шақырым сумен жабдықтау желісін жылыту маусымына дайындау қажет. Жылу беру маусымына дер кезінде және сапалы дайындалу мақсатында өңірлерге 1 маусымға қарай тұрғын үй-коммуналдық шаруашылық, тұрғын үй және әлеуметтік сала объектілерін дайындау жөніндегі іс-шаралар жоспарын бекіту ұсынылды. 1 қыркүйекке дейін білім беру объектілерінің 100% дайындығын қамтамасыз ету қажет. 15 қазанға дейін тұрғын үй-коммуналдық шаруашылық, тұрғын үй, денсаулық сақтау және әлеуметтік саланың барлық объектілерінің толық дайындығын қамтамасыз ету, құрылыс нормалары мен ережелерін сақтамай орнатылған автономдық жылу беру жүйелерін шығаруды аяқтау, инженерлік инфрақұрылым жүйесінің жылу беру маусымына дайындығын белгіленген мерзімде аяқтау, автономдық қазандықтарда отынның нормативтік қорын қамтамасыз ету жұмыстарын толығымен орындау керек", – деді Бейбіт Атамқұлов.
Қанат Махамбет
