Елордада Қазақстанның қысқы чемпионаты мәресіне жетіп, 14 жасар теннисші ересектер арасында ел чемпионы атанды. Әйелдер арасында астаналықтар – 15-тегі Альбина Кәкенова мен одан бір жас кіші Ариана Гогулина бас жүлдені сарапқа салды. Ширек финалдан бастап Ариананың кездесулері тартысты өтіп, үш сетке созылды. Финал да солай болды. Бірінші партияда Альбина 6:4 есебімен басым түсті. Одан кейін екі сетте Гогулина таразы басын аудара білді – 6:2, 6:2.
Қола жүлде Айя Мырзақұлованы 0:6, 6:3, 6:4 есебімен ұтқан Әдемі Аманкелдіге бұйырды.
Ерлер арасында Тимур Мәуленов өз спорттық жолында бірінші рет ел чемпионы атағына қол жеткізді. Ол финалда Арысланбек Айтқұловты жеңді – 7:5, 6:3. Қола жүлдеге Никита Сидоровты 6:4, 6:7 (8:10), 6:4 есебімен тізе бүктірген Тимур Хабибулин ие болды.
Жұптық сында мына теннисшілер жүлдеге ілікті.
Ерлер:
1. Артур Хайрутдинов - Максим Батютенко
2. Ілияс Маратұлы - Вячеслав Кауфельд
3. Тимур Хабибулин - Арысланбек Айтқұлов.
Әйелдер:
1. Ульяна Романова - Полина Слепцова
2. Мария Синицына - Карина Жұмажанова
3. Альбина Кәкенова - Айя Мырзақұлова.
Сонымен қатар қазақстандық теннисшілер халықаралық турнирлерде өнер көрсетуде. Өкінішке орай ерлер арасындағы еліміздің бірінші ракеткасы Александр Бублик Марсель турнирінің финалына шыға алмады. Қазақстандық теннисші жартылай финалда әлемнің 11-інші, осы жарыстың 1-ракеткасы, Польша өкілі Хуберт Гуркачпен кездесті. Поляк теннисшісі 6:4, 7:6 (7:4) есебімен жеңіске жетті.
