Қараша айында ақша айналымы 10,2 трлн теңгені құрады. Бұл қазан айымен салыстырғанда 3,2%-ға немесе 319,5 млрд теңгеге көп көрсеткіш.
Есептік кезеңде KASE индексінің мәні 5,3%-ға өсіп, акция нарығын қаржыландыру көлемі 2,7 %-ға артты.
KASE баспасөз қызметінің хабарлауынша, өткен айда листингілеуден мемлекеттік емес бағалы қағаздардың 8 эмитенті өтті. Ал 2 компанияның бағалы қағаздары алғаш рет биржаның ресми тізіміне енді.
"2020 жылғы 1 желтоқсандағы жағдай бойынша KASE сауда-саттық тізімінде 186 эмитенттің 460 мемлекеттік емес бағалы қағазы тіркелді.
Қараша айындағы сауда-саттықтың орташа көлемі 2 млрд теңгені құрады.
Мәміленің орташа күндік саны - 1 063, орташа көлемі - 1,9 млн теңге болды. Инвесторлардың арасында қайталама нарықта жеке тұлғалар топ бастады. Олардың мәмілелерінің жалпы көлемі 38,1%-ды құрады. Бұл жерде брокерлер мен дилерлердің үлесі - 19,6%, өзге институционалдық инвесторлардың үлесі - 3,3%, бейрезиденттердің қатысуы - 15,6% болды", – деп мәлімдеді биржаның баспасөз қызметі.
Белгілі болғандай, корпоративтік облигация нарығындағы борыштың сауда көлемі 2,6%-ға немесе 382,2 млрд теңгеге азайды.
"Қазан айына қарағанда биржадағы корпоративтік облигациялар нарығының жиынтық көлемі 60,8%-ға немесе 305,3 млрд теңгеге төмендеп, 196,7 млрд теңгені құрады", – деп хабарлады Қазақстан қор биржасының өкілдері.
Мемлекеттік бағалы қағаздардың номиналдық құны 1,9%-ға немесе 308,1 млрд теңгеге өсіп, 16,5 трлн теңгеге жетті", – деп хабарлады баспасөз қызметі.
Қараша айында мемлекеттік бағалы қағаздар нарығының көлемі 66,6%-ға немесе 429,3 млрд теңгеге төмендеп, 215,7 млрд теңгені құрады.
"Мемлекеттік бағалы қағаздардың алғашқы нарығындағы сауда көлемі 167 млрд теңге болды. Көрсеткіш қазан айымен салыстырғанда 72,5%-ға немесе 441,1 млрд теңгеге артық. Қайталама нарықта да оң динамика тіркелді.
Сауда көлемі 31,8 % немесе 11,7 млрд теңгеге өсіп, 48,7 млрд теңгеге жетті", – деген ақпарат таратты қордың баспасөз қызметі.
Есептік кезеңде инвестициялық қорлардың бағалы қағаздары секторында 9 компанияның басқаруындағы 13 қаржы құралы болды. Олардың сауда көлемі 3,1 млрд теңгені құрады. Бұл өткен айымен салыстырғанда 340 млн теңгеге немесе 12,3%-ға артық көрсеткіш.
Абылай Бейбарыс
Atameken Business Telegram каналына жазылып, маңызды ақпараттардан бірінші болып құлағдар болыңыз!
