Бұл туралы Үкімет отырысында Энергетика министрі Болат Ақшолақов айтты, деп хабарлайды inbusiness.kz.
"2022 жылға газ өндіру көлемі 53,3 млрд текше метр газды құрады немесе 2022 жылға арналған жоспардың 103,1%-ы", – деді министр.
Оның айтуынша, тауарлық газ өндіру 27,8 млрд текше метрді немесе 2022 жылға арналған жоспардың 94%-ын құрады.
"Индикаторға қол жеткізбеу Орынбор газ өңдеу зауытында Қарашығанақ газын қабылдауға қойылған шектеулерге, сондай-ақ Теңіз және Қашаған кен орындарында жоспардан тыс жөндеу жұмыстарын жүргізуге байланысты", – деп түсіндірді министр.
Бұл ретте тауарлық газдың ішкі тұтынуы 19,3 млрд текше метрді немесе 2022 жылғы жоспардың 107,2%-ын құрады.
Газ экспорты 4,6 млрд текше метрді немесе 2022 жылғы жоспардың 85,1%-ын құрады.
"Газ экспортының азаюы ішкі нарықтағы тұтыну көлемінің өсуін қамтамасыз етуге мүмкіндік берді. Тұрғындарды газбен қамтамасыз ету - бірінші кезектегі міндет", - деп түсіндірді Ақшолақов.
Оның айтуынша, ішкі нарыққа сұйытылған мұнай газын өндіру көлемі 2,8 млн тоннаны немесе 2022 жылға арналған жоспардың 98%-ын құрады.
"Жоспарланған мәнге қол жеткізбеу Атырау мұнай өңдеу зауыты және "СНПС-Ақтөбемұнайгаз" АҚ ірі зауыттарындағы жөндеу жұмыстарымен байланысты", – деп түсіндірді Энергетика министрлігінің басшысы.
Еске сала кетсек, бұған дейін Болат Ақшолақов Орталық коммуникациялар алаңында Қазақстан 2023 жылы 53,5 млрд текше метр газ өндіруді жоспарлап отырғанын хабарлаған еді.
