/img/tv1.svg
RU KZ
44 300 автокөлік сатылды

44 300 автокөлік сатылды

Отандық автоөндірушілердің нарықтағы үлесі 60%-ға жетті.  

19:19 28 Қаңтар 2020 10269

44 300 автокөлік сатылды

Автор:

Абылай Бейбарыс

Былтыр елімізде 359 млрд 500 мың теңгеге 50 447 автокөлік құрастырылды.

Оның 44 077 бірлігі жеңіл автокөлік болды. «ҚазАвтоӨнеркәсіп» Қазақтан автокөлік саласы кәсіпорындары одағы отандық автоөндіріс саласының өткен жылғы қорытындысын жариялағанда осындай мәлімет таратты.

Есептік кезеңде отандық автозауыттардың конвейерінен 4 247 жүк көлігі, 860 тіркеме және 187 мамандандырылған автотехника шықты. Бір жылда отандық автоөндірушілер 44 300 автокөлік сатты. Нәтижесінде отандық автоөндірушілердің нарықтағы үлесі 60%-ға жетті.

«Ел азаматтары бір жылда 311 млрд теңгеге отандық автокөлік сатып алды», – деді «ҚазАвтоӨнеркәсіп» Қазақтан автокөлік саласы кәсіпорындары одағы стратегиялық жоспарлау бөлімінің директоры Артур Мискарян.

Оның сөзінше, «АЗИЯ АВТО» АҚ 21 200 автокөлік құрастырған және көлік сату көрсеткішін 48,1%-ға жеткізген. Осылайша отандық көлік өндірушілердің көшін бастаған. «СарыарқаАвтоӨндіріс» ЖШС 20 200

автокөлік шығарып, сату көрсеткішін 45,5% -дан асырған. Сәйкесінше екінші орынға орналасқан.

«СемАЗ» ЖШС – 1 500, «КАМАЗ-Инжиниринг» АҚ – 800, Hyundai Trans Auto ЖШС – 400, Daewoo Bus Kazakhstan ЖШС – 1 000 көлік өткізді», – деді Артур Мискарян.

Қазақстанда құрастырылған автобрендтердің ішінде Lada маркасы ерекше сұранысқа ие болыпты. Бір жылда дәл осы брендпен шыққан 15 100 автокөлік сатылыпты.

«Hyundai – 14 900, KIA – 3 700, Ravon – 2 900, Skoda – 1 100, JAC – 1 000, Chevrolet – 700, UAZ – 5 00 бірлік автокөлік өткізді», – деді Артур Мискарян.

Оның айтуынша, 5 315 автокөлік жеңілдетілген несие бағдарламасы бойынша сатылған.

«Ел азаматтарының сатып алу мүмкіндігінің артуы отандық автоөндірушілердің өндірістік қуатын күшейтті. 2015 жылы іске қосылған жеңілдетілген автонесие бағдарламасы салаға серпін беріп отыр. Былтыр  бағдарлама аясында қосымша 10 млрд теңге бөлінді. Бұл соманың 8 млрд теңгесін жеңіл автокөліктерді несиелеуге, 2 млрд теңгесі коммерциялық теxниканы лизингтік қаржыландыруға жұмсалды. Өткен жылы отандық автоөндірушілердің нарықтағы үлесі 60%-ға жетті. Жыл сайын көрсеткіш еселеніп келеді. Үкімет отандық автокөліктердің сатылымын ұлғайту мақсатында жеңілдетілген автонесие бағдарламасын 5 есе ұлғайтуды көздеп отыр. Жоспар орындалса, қазіргі көрсеткіш бірнеше есе өседі. Бұл отандық автоөндірушілер еліміздің автонарығында үстемдік жүргізеді деген сөз», – деп түйді ойын «ҚазАвтоӨнеркәсіп» өкілі.

Абылай Бейбарыс

Былтыр Павлодарда 45 мың автокөлік тіркеуге алынған

Республика бойынша тіркелген көліктердің 3,3 пайызы Павлодар облысына тиесілі.

06 Қаңтар 2020 17:26 10344

«ҚазАвтоӨнеркәсіп» Қазақстан автокөлік саласы кәсіпорындары одағының мәліметінше, 2019 жылы әкімшілік полиция органдарына 1 492 114 автокөлік тіркеуге алынған. Көрсеткіш 2018 жылмен салыстырғанда 12,2%-ға жоғары. Оның 1 385 356-сы бұған дейін тіркеуде болған көліктер. Яғни, олардың тек иелері ғана ауысқан. Ал жаңадан тіркеуге алынған көлік саны – 106 758. Аталған көрсеткіш 2018 жылмен салыстырғанда 27%-ға артып отыр.

Қолданыста болып, қайта тіркелген көліктердің 45 064-і Павлодар облысына тиесілі. Осылайша, Павлодардың жалпы республикалық деңгейдегі үлесі 3,3 пайызды құрап отыр. Ең жоғары көрсеткіш Алматы облысында тіркелген. Бір жыл ішінде бұл өңірде 210 898 автокөлік есепке алынған. Бұл республикалық деңгейдің 15,2%-ы. Ал ең төменгі көрсеткіш Солтүстік Қазақстан облысына тиесілі. Былтыр аталған облыста 31 758 көлік тіркеуге алынған. Үлеске шақсақ, 2,3% болып шығады. Павлодар облысы өңірлер арасында 13-орында тұр.

«Қайта тіркеуге алынған көліктердің үштен бірінің немесе 69,1%-ының қолданыстағы мерзімі 10 жылдан асып кеткен. 20 жылдан асқан көліктердің үлесі – 41,6%», – делінген «ҚазАвтоӨнеркәсіп»-тің хабарламасында.

Автонарықтағы жағдайға назар аударсақ, отандық автопарктің ескіріп келе жатқандығын аңғаруға болады. Мәселен, қолданыста жүрген мерзімі 20 жылдан асып кеткен көліктердің қайталама нарықтағы үлесі 2019 жылмен салыстырғанда 39,7%-дан 41,6%-ға дейін өскен. Ал нарыққа қосылғанына 1-3 жыл ғана болған көліктердің үлесі 4,5%-дан 3,5%-ға дейін төмендеген.

Еске сала кетейік, 2019 жылдың алдына ала қорытындыларына сәйкес, отандық кәсіпорындар 45 мыңнан астам көлік құрастырған. Өндіріс көлемі 2018 жылдың көрсеткіштерінен әлдеқайда жоғары. Әдеттегідей, өндіріс көлемі тұрғысынан «АЗИЯ АВТО», «СарыарқаАвтоӨнеркәсіп» секілді кәсіпорындар көш бастап тұр.

Фархат Әміренов

Қытай ескі көліктерін Ресейге сатады

Қытайдың Гуандун провинциясы пайдаланылған автокөліктерді экспорттай бастады.

25 Шілде 2019 19:42 16906

Импорттаушы елдердің қатарында Ресей, Камбоджа, Нигерия және Мьянма елдері бар. Бұл туралы жергілікті ақпарат құралдары хабарлап жатыр.

Қытайдың сауда министрлігінің айтуынша, биыл бұл елдерге құны 2,5 миллион доллар тұратын 3000  автокөлік сатылады. Олардың сапасы Гуанчжоудағы Оңтүстік-Қытайлық инженерия университетінде тексерілмек. 

China daily мәліметінше, Камбоджаға үш кроссовер және алты седан жеткізіледі. Одан Қытайға 160 мың доллар пайда түседі екен.

Естеріңізге сала кетейік, мамыр айында Аспанасты елінің он аймағынан ескі темір тұлпарларды экпорттауға рұқсат берілген болатын. Алдағы уақытта Бейжің, Шанхай, Тяньцзинь қалалары пайдаланылған көліктер шет елдерге шығара бастайды.

Мамандардың дерегі бойынша, 2019 жылы Ресейде пайдаланылған көліктерге деген сұраныс 55 пайызға артқан. Ресейліктер шет елден әкелінген арзан көліктерді көптеп сатып алып жатыр. Салдарынан жергілікті автокөлік нарығы зардап шегуде.  

Табиғат Нұрболат